Thursday, March 29, 2012

మత్తు

మత్తులో పడి
తమను తామే మర్చిపోయే
భవిష్య నిర్దేశకులు
నేటి యువత.
       *****
బాట వెంట
నాటి సత్రాలను మించి
నేడు మద్యాలయాలు వెలుస్తుంటే
దేశం మత్తెక్కి పోతోంది.
        *******
తన కాళ్ళపై తాను
నిలబడటమెలానో నేర్పిందని
ఈ నేలనే విదిచిపోదా మొక్క
మరి నీవెందుకలా?
      ********

Monday, March 26, 2012

THORANAM

వెళ్తున్న
బంధువులను కూడా
పచ్చగానే సాగనంపుతుందా
తోరణం.
     ******
జీవిత వేగాన్ని
అందుకోలేక
అనుబంధాలేనాడో
వెనుకబడ్డాయి.
     ******
ఒకరి గొంతొకరు పిసుక్కుంటూ
భలే కాపురం చేస్తున్నాయే
ఆ సినిమా పాట సంగీతమూ.
      ********

Sunday, March 25, 2012

VASANTHAM

చూసే కళ్ళను
కాపలాగా పెట్టుకుని
కొమ్మ కొమ్మన ఊయల కట్టుకుని
నిద్రిస్తుందా వసంతం.
       *******
ఎక్కడెక్కడో
నిన్ను వెదికే నాకు
అందాల నా విశ్వమంతా
నిండేవు నీవు.
     *******
నా ఏకాంతాన్ని చూసి
జాబిలి మబ్బు చాటైతే
కలువ ఏకాంతాన్ని చూసి
ఆ మబ్బు కాస్తా కరిగి
నీపై నా సందేశాన్ని కురిపించింది.
            ********

Wednesday, March 21, 2012

KAVITHALU

నీ వెనుక రావడమొక్కటి నేర్పి
నా మనసును
అన్నింటా ముందుంచడం
నీకే చెల్లింది.
      ******
ఈ అనంత ప్రకృతి
నన్ను వరిస్తూ
ప్రేమలేఖ రాస్తే
ముగింపులో నీ చేవ్రాలుకై
ఎదురుచూస్తుంది నా మనసు.
     ********
ఇన్ని సొగసులు తనలో ఉన్నా
నా దృష్టిలో ప్రకృతికి
నీ వెనుక స్థానమే
ఎందుకంటే నీ కన్నా
నన్నెక్కువగా ప్రేమించడం దానికి
చేతగాదు కనుక.
       *******

Tuesday, March 20, 2012

KAVITHALU

దించిన తల ఎత్తే లోపు
చెరువులో స్నానమాడి
గాలి వీపెక్కి
ఆకాశం లోకి పోయిందా మేఘం.
        *******
కాబోయే వాడు
చేతులు చాచి పిలుస్తున్నాడన్న
తొందరలో కూడా
చూడెంత ఒయ్యారంగా
పరుగెడుతోందో ఆ గోదారి
కంగారు పడినా
అంత అందంగా ఉండాలి మరి.
       ********
అన్నిటి కన్నా
అందమైన జంట
ఈ ప్రకృతి నా కవిత.
    *******

Monday, March 19, 2012

KAVITHALU

అంతులేని అనుభవాలను
నాకందించడంలో
ఆ ప్రకృతికి
నా ప్రియురాలే సాటి.
     *******
తన రహస్యాలను తెలుసుకోమంటూ
ప్రకృతి నా ముందు పరచుకుంటే
నీవు మాత్రం రహస్యంగా
నన్ను నీలో దాచి
నా ప్రకృతివైనావు.
     *******
ప్రకృతికీ నా ప్రేయసికీ
ఒకటే పోలిక
ఆస్వాదించే మనసు నాకుంటే
అంతు లేని అనుభవాలతో వారుంటారు.
      ********

Friday, March 16, 2012

KAVITHALU

నీ కన్నులు చూస్తూ
కవితలు వేయి రాయగలను
నీ పలుకులు వింటూ
పాటలు వేయి పాడగలను
కానీ అదేమిటో అవన్నీ
నన్ను పిలిచే నీ పిలుపు కన్నా
మధురంగా లేవు.
          ******
నా హృదయ స్పందనలను
నీ కనురెప్పలు
నిశ్శబ్దంగా పాలిస్తున్నాయి
వేయి వేల వరాల జల్లులా
నా పై అవి కురుస్తుంటే
లోకం నివ్వెర పోతోంది.
       *******
కడలిలా నేను చేతులు చాస్తే
తను గోదారిలా సాగింది
నీలి మబ్బునై నే నవ్వితే
మెరుపులా తను నన్ను తాకింది
ఆశై నేను జీవిస్తే
శ్వాసై తను నన్ను చేరింది.
      *******

Thursday, March 15, 2012

KAVITHALU


గూడు విడిచి
ఎగిరిందో గువ్వ
అందరు చూస్తుండగానే
ఆకాశం వైపుకు పోయింది
ఎందఱో ఆవేదనతో పిలిచారు
దిగిరాలేదు
ఎప్పటికైనా దిగొస్తుందిలే అనుకున్నారు
కాని పైపైకి పోవడమే తన నైజమంటూ
చుక్కల్లో కలిసి
ముడిపడే బ్రతుకులకు
పుస్తెలు కొనే తాహతు లేని వాళ్ళుగా
మమ్ము నిలబెట్టింది.
          *****
అక్కడో అందమైన చిత్రం
చూడడానికి ఇంకొన్ని కళ్ళుంటే
బాగుండనిపించేలా
చూస్తుండగానే ఆనంద భాష్పాలెన్నో
అలా రాలిన భాష్పాలతోనే
ఆ చిత్రమిప్పుడు పలుచబడిందేమో
రెండు కళ్ళు విప్పార్చి చూసినా
నాటి అందం ఇసుమంత కూడా
లేకుండా పోయింది
కనీసం ఆనవాళ్ళు చూపడానికైనా
ఏడాది గడువడిగిందా చేలు.
            *******

Wednesday, March 14, 2012

KAVITHALU

సూది లోకి దారంలా
ఎంత ఒద్దికగా దూరుతోందో
చూడు నా కిటికీకున్న
రంధ్రం నుండి ఈ సూర్యకిరణం.
      ******
ఒంటి నిండా తాను కట్టిన
బట్ట నిండా చిల్లులు పడితే
పొత్తిళ్ళ లోని బిడ్డను
ఎండ కంట పడకుండా
ఎలా దాచాలంటూ
మదన పడుతున్న తల్లిలా
ఉందా ఒజోనే పొర
       ******
గొట్టాల పోగంతా
ఆకాశంలో ఎంత చక్కని
ఆకారంలా అమరిందో చూడు
అచ్చం మానవ అస్థిపంజరంలా.
        *******

Sunday, March 11, 2012

KAVITHALU

         శిల్పం
ఎన్నాళ్ళ కాఠిన్యమో
వదలిపోయిందని
ప్రతీ క్షణం అదే తీరుగా
నాట్యమాడుతూ ఆ శిల్పం
నా కంటికి నిశ్చలంగా కన్పిస్తోంది.
        ********
ఎక్కడ వాటిని చూస్తూ
విరియడం ఆగిపోతాయో ఈ మొగ్గలని
వాడిన పూల జ్ఞాపకాలను
తుడిచేసుకుంటుందా చెట్టు.
         *******
    













Saturday, March 10, 2012

KAVITHA

      ఎవరివో  
ఏ ఆమని పిలుపులతో
చిగురించిన తొలకరివో

ఏ వెన్నెల వలపులతో
విరబూసిన కలువవో
నా కన్నుల చూపులలో
నటనమాడు కోమలివో
ఎవరివో నీవెవరివో?

దివి చూడని అందానివో
కవి రాయని పాటవో
గాలి పాడని లాలివో
భువిని లేని సొగసువో
ఎవరివో నీవెవరివో ?

ఏ చిరుగాలి పల్లకిలో
విహరించే సుగంధానివో
ఏ పచ్చని తోటలో
విరబూసిన కుసుమానివో
ఏ వెన్నెల రాతిరిలో
నే రాసిన వలపుల కవితవో
ఎవరివో నీవెవరివో?

లిపి నేర్చిన చూపువో
వలపు నేర్పిన చెలివో
కలవో మెరుపు మేఖలవో
సరస కావ్యానివో
ఎవరివో నీవెవరివో ?
        ********

Friday, March 9, 2012

AAMAY

       ఆమె
అన్నింటా
 ఆమె సగమే కానీ
కన్నీటిలో మాత్రం
ఆమెకెందుకో అంత
స్వార్ధం.
      *****
తన ఆనందాన్ని
మనకు పంచి
మన కన్నీళ్లను
ఆమె తీసుకోవడం కంటే
ఆడది చేసిన త్యాగామేమిటోయ్
      *****
సీత ఓ యుగంలో
ద్రౌపది ఓ యుగంలో
కన్నీరెట్టి
యుగానికొక్కరనిపించారు
మరి ఈ యుగంలో ఏమిటోయ్
       ******

     


Tuesday, March 6, 2012

NEEDA

           నీడ
జీవితం లోని ఎత్తు పల్లాలను
నాకు నేర్పాలని
నా నీడ
అదిగో అలా.........
     ******
           కొబ్బరాకు
అబ్బ పెళ్లి నాటి తెరను
ప్రణయం నాడే
పెడుతున్నావే అంటూ
కొబ్బరాకును కసురుతోంది
జాబిలీ.
         *******
         చెరువు
ఎంత కాలమలా
నిలబడుతుందో అని
తన పై పడిన
చెట్టు నీడను
ఊయలలూపుతోంది
ఆ చెరువు.
          *********

Monday, March 5, 2012

THAPPATADUGULU

తప్పటడుగులలోనే
అందమంతా ఉందని
ఇప్పటిదాకా అలా
వంకరగానే నడిచి
ఏమంత జాగైందని
వరుడి వేలట్టుకున్నావే  
గోదారి.
      *****
నన్నేమైనా అనుకో
ప్రళయం ముంచుకొస్తున్నా
నీతో ఇంకో నూరేళ్ళ జీవితాన్ని
స్వప్నిస్తా.
     ******
ఎంత దాహమై నా పై పడ్డావో
నా హృదయమంతా కరిగించి
నీ దాహం తీర్చాలనుకున్నా
పాడు గాలి ఒక్క క్షణం ఆగితేగా
అంటుంది ఆ చెరువు
తన పై పడిన చెట్టు నీడతో.
        *******

Sunday, March 4, 2012

KAVITHALU

          కొత్త నీతులు
పిండి కొద్ది రొట్టి
ఏ ఎండకాగొడుగు
ఇచ్చుకో పుచ్చుకో
పని నీది పాట నాది
కాగితానికో కానుక అంటూ
నూతన నీతులు వెలిసాయోయ్
ఆ ప్రభుత్వాఫీస్ గోడలపై.
         ********
నేడు అన్నిటికన్నా
ఆలస్యంగా పండే ఫలం
పాపఫలం ఎంత ఆలస్యమంటే
ఒక జీవితకాలం చాలనంత
ఇది తెలిసేనేమో మన నేతలు
ఎంత పెద్ద పాపమైనా ..................
            *********

Friday, March 2, 2012

PEYDODI PRAANAM

       పేదోడి ప్రాణం
అందని ద్రాక్ష లాగ
అందని వైద్యం
అనుకోలేకపోతోంది
పేదోడి ప్రాణం.
         *****
       విలువలు
అరుదుగా
విలువల పూలు పూయిస్తూ
కళ కు తాను ప్రమాణమై
కూర్చుందా వెండి తెర.
      *****
        అభిసారిక
ఏడ్చి ఏడ్చి ఇక ఏడ్వలేక
మోడై ఎదురు చూస్తూ
నిలబడిన అభిసారిక ఆ తోట
శిశిరాన.
        ********